Янгиликлар
19
МАҲАЛЛАЛАРНИНГ ЯНГИ САЙЛАНГАН ОҚСОҚОЛЛАРИНИНГ ҲУҚУҚИЙ БИЛИМЛАРИ ОШИРИЛМОҚДА
Ўзбекистон Республикаси Президентининг 2019 йил 9 январь куни қабул қилинган ПФ 5618-сон “Жамиятда ҳуқуқий онг ва ҳуқуқий маданиятни шакллантириш тизимини тубдан такомиллаштириш тўғрисида”ги Фармони ижроси юзасидан Сирдарё вилоятида янги сайланган фуқаролар йиғинлари раислари учун малака ошириш курслари ташкил этилди.
- Айтиш жоизки, малака ошириш курсида маърузачилар томонидан ўқитишнинг интерактив усуллари ва видеодарслардан самарали фойдаланилди, - дейди маҳалла фаоллари малакасини ошириш маркази раҳбари Комилжон Ҳайитбоев.
Машғулотларда вилоят адлия бошқармаси масъул ходимлари ҳам иштирок этиб, ҳуқуқий мавзуларда маърузалар қилдилар.
- Тингловчилар учун “Аҳолининг ҳуқуқий онги ва маданиятини юксалтиришнинг долзарб масалалари” мавзусида маъруза қилиб, Ўзбекистон Республикасининг “Жисмоний ва юридик шахсларнинг мурожаатлари тўғрисида”ги ҳамда “Ижтимоий шериклик тўғрисида”ги Қонунларининг мазмун-моҳиятини батафсил тушунтирилди, - дейди вилоят адлия бошқармаси Инсон ҳуқуқларини ҳимоя қилиш бўлими бошлиғи Азизжон Мавлонов.
Маҳалла оқсоқоллари аҳоли томонидан сайланган вакил сифатида уларнинг ҳуқуқларини ҳимоя қилиш, ҳудудда тинчлик-осойишталик ва учун масъул, ҳокимият билан аҳоли ўртасида кўприк вазифасини бажариш каби муҳим вазифани бажаради, шу боисдан ҳам уларнинг ҳуқуқий билимини ошириш бугунги кун учун жуда долзарб мавзу.
- Маҳалла йиғинлари раисларига ҳуқуқий билимлар фаолиятларида асқотади, шу билан бирга уларга туман-шаҳар адлия бўлимлари билан мустаҳкам алоқа ўрнатиш тавсия қилинди, - дейди А.Мавлонов.