Янгиликлар
11
Sport maktabi o‘qituvchisining ish haqi undirib berildi
Guliston tuman sport maktabi o‘qituvchisi A.T. Sirdaryo viloyat adliya boshqarmasiga murojaat qilib, muassasa tomonidan noyabr–dekabr oylariga hisoblangan ish haqi to‘lab berilmayotganini bildirib, mazkur masalada amaliy yordam so‘radi.
Murojaat adliya boshqarmasi tomonidan o‘rganilib, haqiqatdan ham fuqaro A.T.ga tegishli bo‘lgan noyabr–dekabr oylaridagi ish haqi to‘lanmagani aniqlandi.
Vaholanki, Mehnat kodeksining 253-moddasiga ko‘ra xodimlarga ish haqi to‘lash muddatlari jamoa shartnomasida yoki ichki hujjatda, ular mavjud bo‘lmaganda esa mehnat shartnomasida shart qilib ko‘rsatilgan muddatlarda belgilanadi va har yarim oyda bir martadan kam bo‘lishi mumkin emas.
Mazkur holat yuzasidan muammoni ijobiy hal etish choralarini ko‘rish uchun Sport boshqarmasiga taqdimnoma kiritildi. Natijada fuqaro A.T.ga noyabr–dekabr oylari uchun 6 million 700 ming so‘m miqdoridagi ish haqi to‘lab berilishi ta’minlandi.