Янгиликлар
05
Xizmatlar sohasi rivojlanishi uchun shart-sharoitlar yaratiladi
Oʻzbekiston Respublikasi Prezidentining 2025-yil 27-fevraldagi “Xizmatlar sohasi barqaror rivojlanishi uchun qulay shart-sharoitlar yaratishga oid qo'shimcha chora-tadbirlar to‘g‘risida”gi PQ–78-son qarori (PQ–78-son, 27.02.2025-y.) imzolandi.
Qarorga ko‘ra, 2025-yilda xizmatlar sohasini rivojlantirishning asosiy maqsadli ko‘rsatkichlari etib quyidagilar belgilandi:
- xizmatlar hajmini 15 foizga oshirish;
- sohada 3 million kishini daromadli mehnat bilan ta’minlash;
- 52,2 mingta xizmat ko‘rsatish obyektlarini tashkil etish.
Chakana savdo va umumiy ovqatlanish, mehmonxona (joylashtirish) xizmatlari, avtotransportda yo‘lovchi va yuk tashish, transport vositalarini ta’mirlash va ularga texnik xizmat ko‘rsatish, kompyuter xizmatlari, maishiy texnikani ta’mirlash, agro va veterinariya xizmatlarini ko‘rsatuvchi hamda ko‘ngilochar maskanlarda xizmatlar ko‘rsatuvchi tadbirkorlik subyektlari uchun 1 foizlik ijtimoiy soliq stavkasining amal qilish muddati 2028-yil 1-yanvargacha uzaytirildi.
2025-yilda quyidagi miqdorida kredit mablag‘lari yo‘naltiriladi:
-xizmatlar sohasini rivojlantirish uchun 67,4 trillion so‘m;
-xizmat ko‘rsatish obyektlarini tashkil etish uchun developerlar orqali tadbirkorlik subyektlariga noturar joylarni lizingga berishga 4,5 trillion so‘m.
Hududlarda 2025-yilda quyidagi 652 ta drayver loyihalarni infratuzilma bilan ta’minlash uchun 1 trillion so‘m yo‘naltiriladi:
➖72 ta sohil bo'yi dam olish maskanlari;
➖ 62 ta zamonaviy qiyofadagi istirohat bog'lari;
➖154 ta tunu kun faoliyat yuritadigan turizm va gastronomik yo'nalishlarga ixtisoslashgan savdo va ko'ngilochar ko'chalar;
➖ 364 ta yo'l bo'yi va boshqa servis obyektlari.
2025-yil 1-iyuldan quyidagi 11 ta davlat xizmatlari va funksiyalari xususiy sektorga o‘tkaziladi:
1) Rieltorlarning malaka imtihonini oʻtkazish va ularga malaka sertifikatini berish;
2) Baholovchilarning malaka imtihonini oʻtkazish va ularga malaka sertifikatini berish;
3) Sud boshqaruvchisi malaka attestatini berish;
4) Baholovchilarga toifalar berish;
5) Hisoblagichlarni qiyoslashdan oʻtkazish;
6) Karantin ostidagi mahsulotlarni zararsizlantirish (fumigatsiya) boʻyicha faoliyat;
7) Gid (gid-tarjimon), ekskursiya yetakchisi va yoʻriqchi-yoʻl boshlovchilarga malaka sertifikatini berish;
8) Tibbiyot tashkilotlarini akkreditatsiyadan oʻtkazish;
9) Yakka tartibdagi uy-joylarning qurilishi hamda rekonstruksiya qilish ishlari yuzasidan nazorat yuritish;
10) Kichik hajmdagi noturar bino va inshootlarning qurilishi hamda rekonstruksiya qilish ishlari yuzasidan nazorat yuritish;
11) Oʻzbekiston Respublikasiga olib kiriladigan “M” va “N” toifalardagi gʻildirakli yangi transport vositalarining ekologik toifa talablariga muvofiqligini ekologik sertifikatlash.
Qarorga ko‘ra, har bir vazirlik va idoraning funksiyalari xatlovdan o‘tkazilib, ularni xususiy sektorga berish yoki raqamlashtirish bo‘yicha takliflar ishlab chiqiladi.
Qoraqalpogʻiston Respublikasi Joʻqorgʻi Kengesi, Xalq deputatlari viloyatlar va Toshkent shahar kengashlariga soliqqa tortish uchun koʻchmas mulk ijara toʻlovi minimal stavkalariga nisbatan tumanlar (shaharlar) va zonalarga qarab oʻrnatiladigan oshiruvchi koeffitsiyentni faoliyat yoki obyekt turlari boʻyicha tabaqalashtirish vakolati berildi.
2025-yil 1-apreldan boshlab:
Soliq organlari xodimlari tomonidan ularga biriktirilgan korxonalarda yoki mahallalardagi tadbirkorlik subyektlarida quyidagi soliqqa oid huquqbuzarliklar** aniqlanganda quyidagi tartib joriy etiladi:
- birinchi marta ogohlantirish;
- ogohlantirishdan soʻng uch kun muddatda soliqqa oid huquqbuzarlik bartaraf etilmagani yoki takroran aniqlanganda sayyor soliq tekshiruvini oʻtkazish;
- sayyor soliq tekshiruvini quyudagi soliqqa oid huquqbuzarliklar** boʻyicha amalga oshirish va uni tekshiruv boshlangandan soʻng 24 soat ichida “Yagona davlat nazorati” axborot tizimida roʻyxatga olish orqali Biznes-ombudsmanni xabardor etish;
- sayyor soliq tekshiruvi natijalari boʻyicha rasmiylashtirilgan dalolatnoma sayyor soliq tekshiruvi boʻyicha qaror qabul qilish uchun asos boʻlib hisoblanishi.
**
1. Nazorat-kassa texnikasini va (yoki) hisob-kitob terminallarini qoʻllash tartibini buzish.
2. Mehnat faoliyatini amalga oshiruvchi xodimlarni hamda mehnatga haq toʻlash fondini soliq hisobotida aks ettirmaslik.
3. Er maydonlaridan hujjatlarsiz yoxud er uchastkasiga boʻlgan huquqni tasdiqlovchi hujjatlarda koʻrsatilganidan kattaroq hajmda foydalanish.
4. Foydali qazilmalarni noqonuniy qazib olish yoki qazib olingan foydali qazilmalar hajmini soliq hisobotida toʻliq aks ettirmaslik.