Янгиликлар

Конституция – бахтимиз пойдевори

Гулистонда - Конституция - бахтимиз пойдевори - кўрик-танловининг Сирдарё вилояти босқичи бўлиб ўтди.

Ўзбекистон Республикаси Халқ таълими, Адлия вазирликлари, “Камолот” ёшлар ижтимоий ҳаракати, “Тасвирий ойина” ижодий уюшмаси, "Соғлом авлод учун” халқаро хайрия жамғармаси, Ўзбекистон Бадиий академияси ҳамкорлигида ташкил этилган танловнинг вилоят босқичида 30 га яқин иқтидорли ўқувчи иштирок этди.

Тадбир болаларнинг Ватан мадҳи ва бахтли болаликка бағишланган расмлари кўргазмаси, ашула ва рақслари намойиши билан бошланди. “Болалар шаҳарчаси” тарбияланувчиларининг “Камалак” ашула ва рақс ансамбли, 2-мусиқа ва санъат мактаби ўқувчиларининг чиқишлари кўпчиликка манзур бўлди. Гулистон шаҳридаги 16-умумтаълим мактабининг 8-синф ўқувчиси Ҳумоюн Ҳамдамов, Гулистон туманидаги 2-мактабгача таълим муассасаси тарбияланувчиси Мадинабону Муродбекова чизган суратлар алоҳида эътирофга сазовор бўлди.

Кўрик натижаларига кўра, Мирзаобод туманидаги 1-мактаб- интернатнинг 9-синф ўқувчиси Ирода Ҳасанова, Гулистон шаҳридаги 9-умумтаълим мактабининг 6-синф ўқувчиси Назокат Эргашева ва 3-умумтаълим мактабининг 2-синф ўқувчиси Мадина Мадаминова турли йўналишлар бўйича ғолиб деб топилди ва танловнинг мамлакат босқичига йўлланма олди.