Янгиликлар
Янгиер шаҳрида фаолият юритаётган нодавлат-нотижорат ташкилотлари вакиллари билан сайёр учрашув ўтказилди
Янгиер шаҳрида бугунги кунда 22 тадан ортиқ нодавлат нотижорат ташкилотлари фаолият юритмоқда.
Мазкур ташкилотлар фаолиятига оид муаммоларни ўрганиш, шунингдек, сўнгги йилларда мамлакатимизда нодавлат-нотижорат ташкилотлар фаолиятини қўллаб-қувватлаш, такомиллаштириш ва рағбатлантиришга доир қабул қилинган норматив ҳуқуқий ҳужжатлар мазмун-моҳияти ва аҳамиятини тушунтириш мақсадида сайёр учрашув ўтказилди.
Тадбирда Сирдарё вилоят адлия бошқармаси бошлиғи ўринбосари С.Тоғаев, Нодавлат нотижорат ташкилотлари бўлими бошлиғи Қ.Аҳмаджонов, Нодавлат нотижорат ташкилотлари миллий ассосциацияси вилоят бўлими рахбари Ш.Мамараҳимов иштирок этди.
Дастлаб тадбирда Ўзбекистон Республикаси Президентининг “Нодавлат нотижорат ташкилотларини давлат томонидан қўллаб-қувватлаш, уларнинг фаолияти эркинлиги, ҳуқуқлари ва қонуний манфаатлари ҳимоя қилинишини таъминлашга оид қўшимча чора-тадбирлар тўғрисида”ги ПҚ-5012-сон Қарори, “Ижтимоий шериклик тўғрисида”ги Қонун мазмун-моҳияти йиғилиш иштирокчилари эътиборига етказилди.
Бундан ташқари, муҳтарам Президентимизнинг 2021 йил 4 мартдаги ПФ-6181-сон Фармони билан 2021 йил 1 апрелдан нодавлат нотижорат ташкилотлари фаолиятининг очиқлик индекси жорий қилиниши, 2021 йил 1 майдан «Шаффоф хайрия» ягона интерактив портали ишга туширилиши, бу эса ўз навбатида республикамизда нодавлат нотижорат ташкилотларининг ролини янада ошириш учун хизмат қилиши ҳақида алоҳида тўхталиб ўтилди.
Мулоқот давомида Сирдарё вилоят адлия бошқармаси томонидан нодавлат нотижорат ташкилотлари соҳасида амалга оширилган ишлар, нодавлат нотижорат ташкилотларни рўйхатдан ўтказиш тартиби, мазкур ташкилотларнинг моддий техник базасини мустаҳкамлаш йўлида амалга оширилаётган ислоҳотлар ҳақида ҳам атрофлича сўз юритилди.
Шу билан бирга, тадбир давомида “Иқбол” нодавлат нотижорат ташкилоти ходими томонидан тадбирда иштирок этаётган нодавлат нотижорат ташкилотлари раҳбарларига грант маблағлари олиш тартиби, ҳужжатлар тайёрлаш ва тақдим этиладиган ҳужжатлар тўғрисида атрофлича тушунтиришлар берилди.
Сайёр учрашув сўнггида иштирокчиларни қизиқтирган саволларга батафсил жавоблар берилди.
Сирдарё вилоят адлия бошқармаси Ҳуқуқий тарғибот ва маърифат бўлими