Янгиликлар

Боёвут туманида фаолият юритаётган нодавлат-нотижорат ташкилотлари вакиллари билан сайёр учрашув ўтказилди

Сирдарё вилояти адлия бошқармаси ташаббуси билан Нодавлат нотижорат ташкилотлари ассоциацияси ва жамоат фонди билан ҳамкорликда Боёвут туманида фаолият юритаётган нодавлат-нотижорат ташкилотлари вакиллари билан сайёр учрашув ўтказилиб, сўнгги йилларда мамлакатимизда нодавлат-нотижорат ташкилотлар фаолиятини қўллаб-қувватлаш, такомиллаштириш ва рағбатлантиришга доир бир қатор норматив ҳуқуқий ҳужжатлар мазмун-моҳияти ва аҳамияти тўғрисида кенг маълумотлар берилди.

Мулоқот давомида нодавлат нотижорат ташкилотларни рўйхатдан ўтказиш тартиби, мазкур ташкилотларнинг моддий техник базасини мустаҳкамлаш йўлида амалга оширилаётган ислоҳотлар ҳақида атрофлича сўз юритилди.
Шунингдек, Сирдарё вилоят адлия бошқармаси томонидан  нодавлат нотижорат ташкилотлари соҳасида амалга оширилган ишлар, Ўзбекистон Республикаси Президентининг “Нодавлат нотижорат ташкилотларини давлат томонидан қўллаб-қувватлаш, уларнинг фаолияти эркинлиги, ҳуқуқлари ва қонуний манфаатлари ҳимоя қилинишини таъминлашга оид қўшимча чора-тадбирлар тўғрисида”ги ПҚ-5012-сон Қарори, “Ижтимоий шериклик тўғрисида”ги Қонун  мазмун-моҳияти йиғилиш иштирокчилари эътиборига етказилди.

Бундан ташқари, тадбир жараёнида муҳтарам Президентимизнинг 2021 йил 4 мартдаги ПФ-6181-сон Фармони билан 2021 йил 1 апрелдан нодавлат нотижорат ташкилотлари фаолиятининг очиқлик индекси жорий қилиниши, 2021 йил 1 майдан «Шаффоф хайрия» ягона интерактив портали ишга туширилиши, бу эса ўз навбатида республикамизда нодавлат нотижорат ташкилотларининг ролини янада ошириш учун хизмат қилиши ҳақида тўхталиб ўтилди.

Сайёр учрашув сўнггида иштирокчиларни қизиқтирган саволларига батафсил жавоблар берилди.

Сирдарё вилояти адлия бошқармаси Ҳуқуқий тарғибот ва маърифат бўлими