Янгиликлар

СЎРАГАН ЭДИНГИЗ...

Савол: Турмуш ўртоғим билан ажрашганимга 3 йил бўлди, 2 нафар фарзандимиз бор. Аёлим алимент ундириш бўйича судга берибди. Мен қандай ҳолларда алимент тўлашдан озод қилинишим мумкин?

                                                        А.Қаландаров Боёвут туман Боёвут шаҳарчаси

Жавоб: Оила кодекси 105-моддасига мувофиқ қуйидаги ҳолларда:

1.  алимент тўлаётган ота-онанинг бошқа вояга етмаган болалари бўлиб, ундан қонунда белгиланган миқдорда алимент ундирилганда ўша болалар алимент олаётган болаларга нисбатан моддий жиҳатдан камроқ таъминланиб қоладиган бўлса;

2.  алимент тўлаётган ота (она) ногирон бўлиб, моддий жиҳатдан қийналиб келаётган бўлса;

3.  алимент олаётган шахс мустақил даромадга эга бўлган тақдирда, алимент миқдори суд томонидан камайтирилиши мумкин.

  Эътибор беринг! Норманинг иккинчи қисмига мувофиқ агар вояга етмаган бола давлат ёки нодавлат муассасаларининг тўлиқ таъминотида бўлса, суд алимент тўлаётган ота ёки онанинг моддий аҳволини ҳисобга олиб, тўланаётган алимент миқдорини камайтириш ёки уни алимент тўлашдан озод қилиш ҳақида ҳал қилув қарори чиқариши мумкин.

Шунингдек, Оила кодексининг 141-моддасида тарафлар ўртасидаги келишувга мувофиқ алимент қарзини тўлашдан озод қилиш ёки уни камайтиришга тарафларнинг ўзаро розилиги бўлгандагина йўл қўйилиши, вояга етмаган болаларга алимент тўланадиган ҳоллар бундан мустасно эканлиги, агар суд алимент тўлаши шарт бўлган шахс касаллиги ёки бошқа узрли сабабларга кўра алимент тўламаганлигини аниқласа ҳамда унинг моддий ва оилавий аҳволи йиғилган алимент қарзни тўлашга имкон бермайди деб топса, алимент тўловчининг даъвосига биноан уни алимент қарзларини тўлашдан тўла ёки қисман озод этишга ҳақлилиги белгиланган.

Саволга Боёвут туман адлия бўлими етакчи маслаҳатчиси Жавоҳир Сайимов жавоб берди.