Bog'lanish

Telefon
(+998 67) 226-02-53

Elektron manzil
sirdaryo@adliya.uz

Habarni yuborish
Ishonch telefoni 1008

Янгиликлар

26

“ЭНГ ФАОЛ БЛОГЕР” танлови ғолиблари тақдирландилар

Мустақил диёримизда Наврўз шукуҳи кезмоқда. Бу қутлуғ айём вилоятимиз ижод аҳлига баҳор нафаси ва таровати билан биргаликда ижод намуналарининг эътироф этилишидек ифтихор туйғуларини бахшида этди. 

Хабарингиз бор, март ойининг дастлабки кунларида вилоят адлия бошқармаси томонидан “ЭНГ ФАОЛ БЛОГЕР” танлови эълон қилинган эди. Бугун ғолибларни тақдирлаш мақсадида тадбир ташкил этилди.


Тадбирни вилоят адлия бошқармаси бошлиғи Ж.Нуритдинов кириш сўзи билан очди ва бошқариб борди.

  • Аҳолининг ҳуқуқий онги ва ҳуқуқий маданиятини ошириш, фуқаролар ўртасида қонунга бўйсунишни тарғиб қилиш, ушбу соҳадаги мавжуд муаммоларга қарши курашда блогерлар ва жамоатчиликнинг таъсир кучидан оқилона фойдаланиш мазкур танловни ўтказишдан асосий мақсадимиз эди, - деди Ж.Нуритдинов ўз сўзида.
Тадбирда сўзга чиққан адлия бошқармаси Ҳуқуқий тарғибот ва маърифат бўлими бошлиғи Д.Умурзоқова сўз эркинлиги — демократик жамиятнинг асосий устунларидан бири эканлигини алоҳида таъкидлаб, сўнгги икки-уч йилда оммавий ахборот воситалари мазмун-моҳиятидаги янгиликлар, айниқса, нодавлат интернет нашрлари ва ижтимоий тармоқлар фаолиятидаги фаоллик ҳақида тўхталиб ўтди. 
Шунингдек, “Янги Сирдарё” газетаси бўлим муҳаррири, комиссия аъзоси Х.Пардабоева сўзга чиқиб, ижтимоий тармоқлар орқали ахборот олиш ва тарқатиш жараёни ҳар қачонгиданда тезкор, ўз навбатида долзарб саналганлиги боис ижтимоий тармоқлар фойдаланувчиси сифатида ҳар биримиз қонун нормаларини билиб қўйишимиз лозимлиги, журналистлар ва блогерлар ҳам олинган фактларни эълон қилишда уларнинг тўғрилигини текшириб кўриши, аҳоли ишончини суистеъмол қилишдан эҳтиёт бўлиши мақсадга мувофиқлигини таъкидлади.

Глобаллашув, ахборот жамияти шаклланаётган бир шароитда мавжуд иллатларни рўйи-рост ифодалаш, муаммоларга холисона ёндашиш, жамоатчилик назоратини амалга оширишда оммавий ахборот воситалари, шунингдек, мамлакатимиз равнақи учун хизмат қилувчи блогерлар фаолиятини қўллаб - қувватлаш давр талабидир.

Ана шу мақсадга йўғрилган “ЭНГ ФАОЛ БЛОГЕР” танловида иштирок этиш истагини билдирган 8 нафар номзодлардан жами 500 га яқин ижодий ишлар қабул қилинди. 

Танловга тақдим этилган материаллар ҳакамлар ҳайъати томонидан қонунийлик, объективлик, маърифийлик, ишончлилик, фактларни текшириш, ёлғон маълумотларнинг йўқлиги, материалларнинг таҳлилий ва изчил тақдим этилиши, таклиф ва тавсиялар мавжудлиги, аудиториясидаги фуқаролик позияцияси каби мезонларга мувофиқ баҳоланди.

Танлов якунларига кўра Музаффар Умаров 1-ўрин, Ҳусан Исоқулов 2-ўрин, Ғулом Примов 3-ўринга муносиб топилди.

Бундан ташқари, Анвар Туйчиев “Ислоҳотлар жараёнини ёритишдаги энг фаол блогер”, Бахтигул Хидиралиева “Аҳоли мурожаатлари билан энг кўп ишлаган блогер”, Ислом Арибжанов “Тезкор ахборот тарқатувчи блогер” номинацияси соҳиби бўлдилар.

Танлов ғолиблари ҳамда иштирокчилари адлия бошқармасининг статуэтка, совға ва дипломлари билан тақдирландилар.

Ғолибларини мукофотлаш маросими шодиёналарга, табриклар ва қутловларга бой бўлди.