Янгиликлар
НОРМАТИВ-ҲУҚУҚИЙ ҲУЖЖАТЛАР ВА УЛАР ЛОЙИҲАЛАРИНИНГ КОРРУПЦИЯГА ҚАРШИ ЭКСПЕРТИЗАСИНИ ЎТКАЗИШ ТАРТИБИ БЕЛГИЛАНДИ
Ўзбекистон Республикаси адлия вазирининг 2021 йил 24 февралдаги 2-мҳ-сон “Норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказиш тартиби тўғрисидаги низомни тасдиқлаш ҳақида”ги буйруғи белгиланган тартибда давлат рўйхатидан ўтказилди
“Норматив-ҳуқуқий ҳужжатлар тўғрисида”ги Қонун ва юқоридаги Низомга асосан норматив-ҳуқуқий ҳужжатлар ва улар лойиҳаларининг коррупцияга қарши экспертизаси давлат органлари ва ташкилотлари ҳамда адлия органлари томонидан ўтказилади.
Адлия бошқармасида ташкил этилган семинарда норматив-ҳуқуқий ҳужжатлар ва улар лойиҳаларининг коррупцияга қарши экспертизасини ўтказишнинг янги тартиби тушунтирилди.
Тадбирда маҳаллий давлат ҳокимияти ҳамда вилоят даражасидаги давлат ташкилотлари юридик хизмати ходимлари иштирок этди.
Семинарда бошқарманинг Ҳуқуқий экспертиза ва юридик хизматлар фаолиятини мувофиқлаштириш бўлими бошлиғи Даврон Бурхонов коррупциявий омиллар, лойиҳаларнинг коррупцияга қарши экспертизасини ўтказиш тартиби, амалдаги норматив-ҳуқуқий ҳужжатларнинг коррупцияга қарши экспертизасини ўтказиш тартиби, шунингдек, коррупцияга қарши экспертизани ўтказувчи адлия органи ходимининг ҳуқуқ ва мажбуриятлари тўғрисида атрофлича маълумот ҳамда иштирокчиларни бу борада қизиқтирган саволларига батафсил жавоб берди.
Сирдарё вилояти адлия бошқармаси Ҳуқуқий тарғибот ва маърифат бўлими