Янгиликлар

МИРЗАОБОДЛИК ҚИЗ 25 ЁШГА КИРИБ, ТУРМУШГА ЧИҚАДИГАН БЎЛГАНИДА МЕТРИКА ВА ПАСПОРТ ОЛДИ

Мирзаобод туман Йўлдошобод маҳалла фуқаролар йиғинида яшовчи фуқаро Гулноза Усманова Мирзаобод туман адлия бўлимига ариза билан мурожаат қилиб, ўзининг 21.03.1995 йилда туғилганлиги, ҳозирги кунга қадар туғилганлик ҳақидаги гувоҳнома ҳамда фуқаролик паспорти олмаганлигини баён этган. Туман адлия бўлимининг ҳуқуқий тушунтириши натижасида, фуқаро ариза билан Фуқаролик ишлари бўйича Гулистон туманлараро судига туғилганлик фактини белгилаш тўғрисида мурожаат қилди. Шу йил 7 октябрида суднинг ҳал қилув қарори қабул қилинди.

• Онаси Гулчеҳра Усманованинг айтишича, уни уйда дунёга келтирган экан. Туғилганлик гувоҳномаси олишга эътибор беришмаган, исмини Гулноза деб қўйишган. Қизча сал катта бўлгач, Тошкент шаҳрига, қариндошлариникига юборишган, у ерда уйда диний таълимот олган. Нима бўлганда ҳам ниҳоят, қиз турмушга чиқадиган бўлганда ҳужжат кераклигини англаб етиб, бизга мурожаат қилишди. Биз фуқарога ҳуқуқий тушунтириш бериб, аризаси билан судга йўлладик. 28 октябрь куни Мирзаобод тумани ФҲДЁ дан туғилганлик ҳақидаги гувоҳнома ҳамда паспортини олди, - дейди Мирзаобод туман адлия бўлими бош маслаҳатчиси Ҳамдам Примқулов.

- Ўзимни қайта туғилгандек ҳис этдим. Фуқаролик ҳужжатим бор эди менинг ҳам. Адлия ходимларига минг раҳмат, - дейди Гулноза Усманова.