Янгиликлар

Сўраган эдингиз...

САВОЛ: Фарзандликка олувчилар эмансипация қилинган вояга етмаганнинг мажбуриятлари бўйича жавобгар бўлиши мумкинми?

Н.Отабоев, Гулистон шаҳри 

ЖАВОБ: Вояга етмаган шахсни тўла муомалага лаёқатли деб эълон қилиш Эмансипация дейилади. Ўзбекистон Республикаси “Фуқаролик кодекси”нинг 28-моддасига кўра, ўн олти ёшга тўлган вояга етмаган шахс меҳнат шартномаси бўйича ишлаётган бўлса ёки ота-онаси, фарзандликка олувчилари ёхуд ҳомийсининг розилигига биноан тадбиркорлик фаолияти билан шуғулланаётган бўлса, у тўла муомалага лаёқатли деб эълон қилиниши мумкин. Бу эса ота-онанинг, фарзандликка олувчиларнинг ёки ҳомийнинг розилиги билан васийлик ва ҳомийлик органининг қарорига мувофиқ ёхуд, бундай розилик бўлмаган тақдирда, суднинг қарори билан амалга оширилади.

Ота-она, фарзандликка олувчилар ва ҳомий эмансипация қилинган вояга етмаганнинг мажбуриятлари бўйича, хусусан, у етказган зарар оқибатида келиб чиққан мажбуриятлар бўйича жавобгар бўлмайдилар.

Саволга Сирдарё вилоят адлия бошқармаси Ҳуқуқий тарғибот ва маърифат бўлими етакчи маслаҳатчиси Дилноза Умрзоқова жавоб берди.