Янгиликлар

Қоидаларга қатъий амал қилайлик! Ўзимиз учун эмас, фарзандлар, набиралар учун…

Ишда ўтириб, жажжигина набирамнинг суратига кўзим тушди. Суратда беш ёшлардаги жажжи қизалоқ дунёнинг барча қувончини ўзида жам қилиб, кулиб турибди. Коронавирус пандемияси шу фариштачага ҳам хавф солиб турганини ўйлаб, тирноғимгача музлаб кетдим…

Президентимиз 3 апрель куни коронавирус пандемияси келтириб чиқарган инқирозга қарши курашиш шароитида тадбиркорликни қўллаб-қувватлаш масалалари бўйича видеоселектор йиғилишида яна бир бор халққа мурожаат қилди.

Президентимиз қуйидагиларни таъкидлади:

“Азиз ватандошлар, нуроний отахон ва мунис онахонлар, қадрли фарзандларим! Кўпга келган ва жаҳон аҳли азият чекаётган бу қийин кунлар, албатта, ўтади. Бизнинг буюк ва танти халқимиз кўп асрлик тарихида не-не бало-қазоларни, урушлар ва очарчиликларни мардонавор енгиб ўтган. Бу синовдан ҳам муносиб ўтиб олишимизга қатъий ишонаман.

Ҳаммамиз янада жипслашиб, сабр-матонатли бўлсак, шифокорлар тавсияларига тўлиқ амал қилсак, албатта, бу касалликни тезроқ енгиб ўтамиз!

Бу курашда тиббий чоралар билан бирга юксак тафаккур, қатъий интизом, сабр-тоқат ва улкан масъулият кўрсатишимиз лозим. Бу сифатлар бизнинг энг асосий ва энг таъсирчан қуролимизга айланиши шарт.

 Ўзбекистонда ҳеч бир инсон, ҳеч бир оила давлатимиз ва жамиятимиз эътибори ва ғамхўрлигидан четда қолмайди!

Яратганнинг ўзи халқимизни ва бутун инсониятни бу офатдан тезроқ озод қилсин, барчамизни ўз паноҳида асрасин!”.

Бироқ айрим фуқароларимизнинг карантин тартибига риоя этмаганлиги, айримлар эса бу оғир кунларда турли тантанаю тадбирлар ўтказганлиги туфайли коронавирусга чалинганлар сони ошиб бормоқда.

Ҳурматли ватандошлар, ушбу мурожаат ҳаммамизни огоҳ бўлишга чақирмоқда.

 Биз фақат ўзимизни эмас, балки ота-онамиз, фарзандларимиз, набираларимизнинг соғлигини ўйлашимиз керак.

 Аксарият чет эл давлатлари Ўзбекистонда коронавируснинг олдини олиш бўйича қилинаётган саъй-ҳаракатларни қўллаб-қувватлади.

Лекин айрим фуқароларимиз ҳанузгача бу касалликнинг қанчалик даражада хавфли эканлигини тушуниб етмаяптилар.

Энди уйғониш керак. Карантин талабларига қатъий риоя этилишини ҳар биримиз таъминлашимиз зарур.

Эндиликда Ўзбекистонда коронавирусдан зарарланиш ҳолатлари 472 нафарни ташкил этмоқда.

Ўзбекистонда коронавируснинг илк бемори 15 март куни қайд этилганди.

Яна қандай усулда бизни огоҳлантиришлари керак?

Яқинда Microsoft асосчиси, миллиардер Билл Гейтс АҚШнинг баъзи штатлари коронавирус тарқалишинг олдини олиш учун ҳанузгача карантин чораларини киритмаётганини танқид қилди. Унинг фикрича, пандемия оқибатларини минималлаштириш учун 10 ҳафта қатъий карантин зарур.

Миллиардер коронавирус тарқалишининг олдини олиш учун “карантинга умуммиллий изчил ёндашув”га чақирди.

Гейтс баъзи штатлар губернаторлари чекловчи чоралар киритмаганини танқид қилган. Ҳозирда 5 штатда ҳанузгача одамларга уйда қолиш буюрилмаган, 7 тасида эса карантин алоҳида ҳудудлардагина киритилган.

“Бу борадаги чигаллик иқтисодий муаммоларни кўпайтиради, вирус қайтиши имкониятини оширади ва кўп сонли ўлимларга олиб келади”, – деб айтган миллиардер. 

Миллиардер АҚШ ҳукуматининг суст ҳаракат қилишини биринчи марта танқид қилиши эмас. Ўтган ҳафта у АҚШ тезкорлик билан ҳаракат қилмаганини ва карантин киритиш билан бир неча ойга кечикканини айтган. Унинг таъкидлашича, карантин киритилиши иқтисодиёт учун фалокатли оқибатларга олиб келса-да, уни узайтириш лозим.

АҚШдек гигант давлатда ушбу вируснинг олдини олиш бўйича чоралар етарли даражада эмаслигини мана шу мисолдан ҳам кўриш мумкин. Биз бор имкониятлардан фойдаланайлик.

 Ҳурматли ва азиз юртдошлар! Ўзингиз учун эмас, балки фарзандларингиз, ота-онангиз, набираларингизни соғлиги учун, илтимос, уйда бўлинг!

Сафар Тоғаев,
Сирдарё вилоят адлия бошқармаси бошлиғи ўринбосари