Янгиликлар

МАЛИКАГА АТАЛГАН АРАВАЧА

         Гулистон шаҳрилик 13 ёшли Малика болаликдан 1 гуруҳ ногирони, туғилганидан буён ота-онаси, бобо-бувисининг қарамоғида, ардоғида.
-       Бу ҳам Аллоҳнинг синови, - дейди қизчанинг бобоси Муҳаммаджон ака. – Худо суйган бандаларига берар экан синовни. Маликани бошқа набираларимиздан кам кўрмаймиз. Ҳаёт учун курашяпти у.
 Мустақилликнинг 28 йиллиги арафасида, “Инсон ҳуқуқлари-олий қадрият” акцияси доирасида  вилоят адлия бошқармаси бошлиғи Жамшидхон Нуритдинов Гулистон шаҳридаги Истиқлол маҳалласида жажжи Малика яшаётган хонадонга ташриф буюрди. Маликахон бобоси ва бувисиникида меҳмонда экан.
Адлия бошқармасининг совғаси – Тошкент шаҳридан буюртма қилинган ногиронлик аравачасини кўриб, бувиси Роҳила опанинг кўзидан ёш чиқди. 
-        Набирамга ҳайит арафасида берилган ногиронлик аравачаси катта ёшдаги одамга мўлжалланган бўлиб, олиб юришга қийналаётган эдик, раҳмат сизларга, худди ўзига атаб ясалгандек. Бизни энг азиз ва энг улуғ байрам арафасида йўқлаб келганингиз, кўнгли ярим набирам учун ажойиб совға келтирганингиз учун раҳмат! Савоб иш қилиб асло чарчаманг, -  дея хурсандчилигини изҳор этиб, дуога қўл очди Роҳила опа.