Соғлом она соғлом жамият демакдир

Соҳамиз тақозоси сабаб турли тақдирларни, турлича феълли кишиларни, инсон ҳаётида юз бераётган турли вазиятларнинг гувоҳи бўлишимизга тўғри келади.

Ишхонага эрталаб келишим билан мени ҳали анча эрта бўлишига қарамай эшик олдида бир аёл кутиб олди. Унинг нигоҳларида мен руҳий тушкинлик ва изтироб, кўзларида эса аллақандай хавотир борлигини тез пайқадим. Саломлашгач хонага таклиф қилдим.

-Мен водийдан келдим. Синглим, энди нима қиламан?! Маҳалла-куй ичида қандай бош кўтариб юраман, гулдай қизимнинг тақдири нима бўлади,-дея зорланиб кетди. Унинг айтишича, бир неча йил олдин қизини бизнинг туманда яшовчи севган йигитига унаштирилганлигини, у йигит илгари водийда тадбиркорлик билан шуғулланганлигини, кейинчалик тадбиркорликдан келган даромадига қаноат қилмай, чет элга бир неча йилга ишлашга кетгани ва чет элдан келиб тўйни бошлаб юборган. ФҲДЁ бўлимига никоҳ тузилганлигини қайд этиш ҳақидаги аризасига асосан тиббий кўрикдан ўтганда йигитда ОИТС касаллиги борлиги аниқланганини айтиб кўзига ёш олди. Шунда мен қизнинг ҳаёти ҳали олдинда эканлиги, бундан хафа эмас, балки, фожеали якун топиши мумкин бўлган қисматнинг олди олинганлигидан хурсанд бўлиш кераклигини аёлга айтганимда унинг кўзида умид учқунлари пайдо бўлганлигини сездим. ЎзР Адлия вазирининг 2013 йил

31 декабрдаги буйруғи билан тасдиқланган “Фуқаролик ҳолати далолатномаларини ёзиш органларида иш юритиш тартиби тўғрисидаги Йўриқнома”нинг 91-бандига асосан никоҳ тузилганлигини қайд этиш ҳақидаги ариза берилган кундан бошлаб 4 ой ичида йўқланмаган аризалар далолатнома тузган ҳолда ёқиб юбориш йўли билан йўқ қилинишини тушунтирдим.

Лекин бошқа жуфтликнинг тақдири мени ҳам ўйлантириб қўйди. Фуқаролар Г. ва Н. бўлимимизга қонуний никоҳни қайд этиш ҳақида ариза билан мурожаат қилиб, шу кунга қадар шаръий никоҳ асосида яшаб келаётганликлари, ҳозирда келин ҳомиладорлигини билдиришди. Шундан сўнг келин-куёв ўз хоҳишларига кўра белгиланган тартибда тиббий кўрикдан ўтишди... Ўтишдию.. Тиббий кўрик натижалари улар ўйлагандай бўлиб чиқмади... Куёвда ОИТС касаллиги мавжудлиги аниқланди. Ҳомила ва онанинг соғлиги, қолаверса оиланинг кейинги тақдири нима бўлади?! Ҳозир келинда бу бедаво дард аниқланмабди, хўш, кейинчалик унга албатта юқмаслигига ким кафолат беради?

Ўзбекистон Республикаси Вазирлар Маҳкамасининг 2003 йил 25 августдаги “Никоҳланувчи шахсларни тиббий кўрикдан ўтказиш тўғрисида”ги 365-сон Қарори никоҳланувчиларнинг тиббий кўрикдан ўтиши келажак авлоднинг баркамол шахс бўлиб етишишининг пойдевори эканлиги, авлоддан авлодга ўтиши мумкин бўлган ҳар хил ирсий касалликларнинг олди олиниши мумкинлиги, қолаверса, жуфтликлар бир-бирларининг соғликлари ҳақида яқиндан хабардор бўлишларига имкон бўлиши ва бунинг натижасида туғилажак фарзандларининг соғлигини таъминлашлари мумкин-ку. Шунингдек, мазкур қарор асосида тиббий кўрикдан ўтиш бепул амалга оширилиши ҳукуматимиз томонидан аҳолининг саломатлигини муҳофаза қилиш борасида олиб борилаётган самарали чоралари исботи эмасми!? Наҳотки мана шундай имкониятлар бўла туриб, инсон ўз соғлигига лоқайд бўлиши мумкин!

Д.Жураева, Сардоба туман ФҲДЁ бўлими мудири