Ватан ҳисси – ўз қадрдон юртига самимий ва абадий муҳаббат, унинг эришган ва эришаётган ноёб ютуқлари билан фахрланиш туйғусидир. Ортда қолган йиллар мобайнида мустақиллик биз учун энг азиз ва энг улуғ қадрият, миллий ўзликни англаш, фахр ва ифтихор рамзи, интилишларимиз, ютуқ ва муваффақиятларимиз манбаи сифатида юртдошларимиз қалбидан мустаҳкам ўрин эгаллади. Эндиликда олдимизда турган энг муҳим ва ҳаётий аҳамиятга эга бўлган вазифалардан бири мустақиллигимизни, юртимиздаги тинчликни кўз қорачиғидек асраш, уни турли хавф-хатарлардан ҳимоя қилишдир. Чунки бугунги кунда дунёда юз бераётган турли воқеа-ҳодисалар, Афғонистон, Ироқ, Сурия, Украина ва бошқа бир қатор мамлакатлардаги нотинчликлар терроризм ва экстремизмнинг тобора кенг қулоч ёйиб бораётгани биздан ўта ҳушёр ва огоҳ бўлиб яшашни талаб этмоқда.

Юқоридаги фикрлардан келиб чиқиб, қуйидагиларга эътибор қаратиш муҳим:

Биринчидан, биз лоқайдлик ва эътиборсизликка, бепарволик ва беғамликка йўл қўймаслигимиз зарур. Бу ишга юртимизнинг ҳар бир фуқароси, мактаб ўқувчиларидан тортиб, кекса отахон ва онахонларимизга қадар масъул эканлигини англашимиз, мамлакатимиз ён-атрофида, минтақада ва дунёда юзага келаётган ҳар қандай қарама-қаршилик ва қонли тўқнашувлардан, табиат катаклизмлари ва фавқулодда воқеа-ҳодисалар натижасида юзага келаётган талафотлардан тўғри хулоса чиқарган ҳолда фаол ҳаётий позицияга эга бўлишимиз катта аҳамият касб этади.

Иккинчидан, Президентимиз барчамизнинг янада ҳушёр ва огоҳ бўлишимиз зарурлигини айтиб ўтди. Буни ҳаётнинг ўзи, дунё ва минтақадаги сиёсий вазият талаб этмоқда. Демак, бугунги кундаги асосий вазифамиз мамлакатимизнинг миллий манфаатларидан келиб чиққан ҳолда, ҳушёр ва огоҳ яшашдан иборатдир. Доимо ҳушёр ва огоҳ бўлиш ҳаётимиз қонунига, фуқаролик мажбуриятимизга айланиши лозим.

Маълумки, инсон ўзлигини англагани, насл-насабини чуқурроқ билгани сари юрагида Ватанга муҳаббат туйғуси илдиз отиб, улғая боради. Бу илдиз қанча теран бўлса, туғилиб ўсган юртга муҳаббат ҳам шу қадар юксак бўлади. Албатта, жаҳон кенг, дунёда мамлакат кўп, лекин бу оламда бетакрор она юртимиз, Ўзбекистонимиз яккаю ягона. Бу гўзал юрт, бу муқаддас замин фақат бизга аталган. Мана шу улуғ туйғу ҳар биримизнинг дилимизга жо бўлиши, ҳаётимиз мазмунига айланиши лозимлигини таъкидладилар.

Ўзбекистон Республикаси халқаро муносабатларнинг тўла ҳуқуқли субъекти сифатида мустақил, изчил ва ташаббускор ташқи сиёсат юритиб келаётган суверен давлатдир.“Ўзбекистон олтмишдан ортиқ нуфузли халқаро ва минтақавий ташкилотлар аъзосидир. Ўзбекистон Республикасининг давлат мустақиллигини 144 мамлакат тан олган, 131 давлат билан дипломатик муносабатлар ўрнатилган. Дунёнинг 46 давлатида мамлакатимизнинг дипломатик ваколатхоналари (элчихоналар, консулликлар), Тошкентда эса олтмишдан ортиқ элчихона ҳамда халқаро ташкилотлар ваколатхоналари фаолият кўрсатмоқда”.

Айни пайтда бутун дунёда ушбу барқарор тараққиёт, тинчликпарвар халқимизнинг бунёдкорлик меҳнати, мамлакатимиздаги сиёсий барқарорлик ва миллий хавфсизликка рахна солиши мумкин бўлган хавф ҳамда таҳдидлар кучаймоқда. Жаҳоннинг турли минтақалари, шу жумладан Ўзбекистон атрофида зиддиятлар кучаймоқда, қуролли тўқнашув ва низолар кескин тус олмоқда.

Шундай жараёнлар кечаётган бир пайтда, тинчликни сақлаш ва мустаҳкамлаш масаласи умумбашарий муаммодир. Инсоният тараққиётининг барча босқичларида жамиятнинг асосий масалалари, биринчи навбатда, тинчлик-тотувлик ҳолатидагина самарали ҳал этилган. Шу боисдан хам юрт тинчлиги – барқарор тараққиёт гаровидир. Тинчликни сақлаш, муаммосини ўз-ўзидан кишиларнинг хохиш-истаги, орзу-умидлари билан ҳал бўлиб қолмайди. Инсоният учун муқаддас бу қадриятга доимо ҳушёр ва қатъий ҳаракатлар туфайлигина эришилган. Тинчлик ва осойишталик учун доимий ва қатъий ҳаракат қилиш, ҳамжиҳатликда курашиш. Юртбошимиз таъкидлаганларидек “ ҳушёрлик, огоҳ бўлиб яшаш – бу бир кунлик ёки бир ойлик мавсумий масала эмас, балки кундалик иш, кундалик амалий ҳаракат бўлиши лозим”.

Демак, ҳар бир инсоннинг ўз ишини сидқидилдан амалга ошириши, лоқайдлик, бепарволикнинг олдини олиши, ён-атрофида бўлаётган воқеа-ҳодисаларга ҳушёрлик билан қараб, Ватан тинчлиги йўлида сергак ва огоҳ бўлиб яшаши аждодларимизга армон бўлиб қолган, биз эришган мустақиллик ва тинчлик-осойишталикни кўз қорачиғидек асраб-авайлашнинг муҳим омили ҳисобланади. Буни ҳеч қачон унутмаслигимиз, тинчлик учун доимо ўзимизнинг бор куч ва имкониятларимизни сафарбар этиб яшашимиз лозим. Чунки, бугунги мураккаб ва таҳликали замонда бизнинг ютуқларимизни кўролмасдан, осуда ҳаётимизни издан чиқаришга уринаётган кучлар бор. Бундай ёвуз кучлардан доимо огоҳ бўлиб, уларга қарши ҳамжиҳатликда курашиш ҳар бир юртдошимиз олдида турган муҳим вазифа саналади.

Президентимиз таъкидлаганларидек, “Агар биз аҳил бўлсак, эл-юрт манфаати йўлида бир тану бир жон бўлиб яшасак, ўзимиздан сотқин чиқмаса, ўзбек халқини ҳеч ким ҳеч қачон енга олмайди”. Тинчлик бор экан, кўнглимиз хотиржам, ҳар куни эрталаб эмин-эркин ишга, ўқишга отланамиз. Тинчлик барқарор экан, юртимизнинг турли ҳудудларида ободончилик, бунёдкорлик ишлари бардавом. Осойишталик ҳукмронки, ёшларимиз замонавий таълим масканларида таълим олиб, илм-фан чўққиларини эгаллашмоқда, фан санъат ва спорт соҳаларида мислсиз ютуқларни қўлга киритишмоқда. Юртимиз осойишта экан, ҳар куни байрам, ҳар куни шодиёна. Дунёнинг турли бурчакларидан келган меҳмонлар мамлакатимиздаги аҳиллик, барқарорлик ва тараққиётга ҳавас билан қарамоқда. Бунинг учун барчамиз Яратганга шукроналар айтамиз.

Ш.Ниязов, Сирдарё туман 1- сонДНИ нотариуси